Statsråden inviterte alle kommunane i landet til å søkje om å få delta i eit forsøk med røysterett for 16- og 17-åringar ved kommunestyrevalet i 2011. Fristen for å søkje var 1. juli 2009.

Kommunal- og regionaldepartementet har ved utløpet av fristen teke imot 127 søknadar. Det er lagt opp til et forsøk med eit mindre tal kommunar. I prosessen med å velje ut kommunane vil det bli lagt vekt på å få med både store, mellomstore og små kommunar, geografisk spreiing, variasjon i den politiske samansettinga av kommunestyret, både distriktskommunar og kommunar i meir sentrale strøk. Det blir også lagt vekt på variasjon i alderssamansettinga, målt som del av befolkninga under 30 år. Departementet vil også sjå på om den enkelte kommune har klart å synliggjøre at den har ein bevisst politikk for å få ungdom engasjert i politisk arbeid eller i kommunale politiske prosessar.

- No skal vi gå nøye gjennom søknadane. Vi vil i løpet av hausten offentleggjere kven av kommunane som blir vald ut til å delta i forsøket, seier statsråden.

Kjelde: Kommunal- og regionaldepartementet

Kommunane Sauda og Time har valt å ikkje delta i forsøket.