Ettersom Garborgsenteret si hovudmålgruppe er ungdom og unge vaksne, har Garborgsenteret oppretta ei referansegruppe beståande av tolv elevar ifrå vidaregåande skule. Med jamne mellomrom får dei delta i utviklinga av utstillinga. På samling 2.9. fekk dei ein dag i lag med fotografen Ingeborg Skrudland og medieeksperten Vilhelm Skjærpe. Dette var ikkje berre for å verte betre fotografar, men like mykje med tanke på å ta bilete til Garborgsenteret si utstilling. 

Den 2.9. fekk nokre bli med Skrudland ut på landet for å ta bilete av landskap og dyr, medan andre vart med Skjærpe til Bryne sentrum for å knipse menneske, plakatar og skilt - og som me kan sjå var det dyr i Sandtangen på Bryne òg. 

Elevane viste seg å vera både ivrige, kreative og dyktige. Nokre av dei hadde eigne speglreflekskamera og var allereie erfarne hobbyfotografar. Skjærpe, som er engasjert av Garborgsenteret for å laga utstillinga, var veldig imponert: "Eg tykte dei hadde mange gode idear og auge for gode motiv." På spørsmål om bileta kan brukast i utstillinga, nikkar han bestemt go svarar: "Ja, det er det ingen tvil om."  

Fotograf Ingeborg Skrudland, som tok med seg ei gruppe rundt på Jæren for å ta landskapsbilete, var likså nøgd. Ho nyttar ord som "reflekterte" og "klåre meiningar" når ho vert beden om å skildra dei elevane ho hadde med seg. "Det var tydeleg at fleire av dei hadde fotoerfaring. Dei var kreative og gode til å utvikla idear."

 Under kan du sjå nokre av bileta som elevane i referansegruppa tok (fotografar: Astrid Salte Wiig, Ine Kelly Rusnes, Marita Baklund, Kristin Frafjord, Linn Ree Årstad):